રાજકોટ જિલ્લા પંચાયતના નવા હોદેદારોની વરણી

રાજકોટ જિલ્લા પંચાયતના નવા હોદેદારોની વરણી

મહત્વના બંને પદ પર OBC સમાજને પ્રધાન્ય : પ્રમુખ તરીકે છેલ્લી ઘડીએ ટિકિટ મેળવનાર કુવાડવા-બેઠકના વિજેતા સંજયભાઇ પીપળીયાની વરણી, સામતભાઇ બાંભવા ઉપપ્રમુખ : કારોબારી ચેરમેનમાં નરશીભાઇ સોજીત્રા, પક્ષના નેતા પારૂલબેન કણસાગરા અને દંડકની જવાબદારી અમરશીભાઇ ચૌહાણને સોંપાઇ

અગ્ર ગુજરાત, રાજકોટ

રાજકોટ જિલ્લા પંચાયતમાં આજે પ્રમુખ અને ઉપપ્રમુખ સહિતના હોદેદારોની વરણી કરવામાં આવી હતી. ગઇકાલે ફોર્મ ભર્યા બાદ આજે વિવિધ જાહેરાત કરવામાં આવી હતી. જેમાં કુવાડવા બેઠક પર છેલ્લી ઘડીએ ટિકિટ મેળવનાર સંજય પીપળીયાને જિલ્લા પંચાયતના નવા પ્રમુખ અને કોલીથડ બેઠકના વિજેતા ઉમેદવાર સામત બાંભવાને ઉપપ્રમુખ તરીકે નિયુકત કરવામાં આવ્યા છે. જયારે કારોબારી ચેરમેનમાં નરશીભાઇ સોજીત્રા, પક્ષના નેતા તરીકે પારૂલબેન કણસાગરા અને દંડક તરીકે અમરશીભાઇ ચૌહાણને જવાબદારી સોંપાઇ છે.

આ વખતની પ્રમુખ અને ઉપપ્રમુખની પસંદગીમાં ભાજપ હાઈકમાન્ડ દ્વારા જ્ઞાતિગત સમીકરણોને ખૂબ ઝીણવટ પૂર્વક ધ્યાનમાં રાખવામાં આવ્યા હોય તેવું સ્પષ્ટપણે દેખાઈ રહ્યું છે. પક્ષ દ્વારા પ્રમુખ અને ઉપપ્રમુખ બંને સર્વોચ્ચ પદો પર OBC ચહેરાને પ્રાધાન્ય આપવામાં આવ્યું છે. આ નિર્ણય પાછળ આગામી સ્થાનિક અને સામાન્ય ચૂંટણીઓના સમીકરણો જવાબદાર હોવાનું રાજકીય વિશ્લેષકો માની રહ્યા છે. જિલ્લા પંચાયતના બંને મુખ્ય હોદ્દાઓ પર OBC જ્ઞાતિનું પ્રતિનિધિત્વ ગોઠવાઈ જતાં હવે કારોબારી સમિતિના ચેરમેન પદ પર પાટીદાર સમાજના સભ્યની વરણી કરાઇ છે. સંગઠન દ્વારા આ રીતે તમામ જ્ઞાતિઓ વચ્ચે સત્તાનું સંતુલન જાળવવાનો પૂરતો પ્રયાસ કરવામાં આવ્યો છે.

આ સમગ્ર પ્રક્રિયામાં સૌથી વધુ આકર્ષણ અને ચર્ચાનું કેન્દ્ર કુવાડવા બેઠક રહી હતી, જ્યાં ઉમેદવારી ફોર્મ ભરવાના દિવસથી જ હાઈવોલ્ટેજ રાજકીય ડ્રામા જોવા મળ્યો હતો. ભાજપ દ્વારા જ્યારે પ્રથમ ઉમેદવાર યાદી જાહેર કરવામાં આવી હતી, ત્યારે તેમાં કુવાડવા બેઠક પર કોઈ ઉમેદવારના નામની જાહેરાત કરવામાં આવી ન હતી અને સસ્પેન્સ જાળવી રાખવામાં આવ્યું હતું. ત્યારબાદ, ફોર્મ ભરવાના અંતિમ દિવસે સવારે પક્ષ દ્વારા દેવ કોરડિયાને ટિકિટ આપવામાં આવી હતી. ટિકિટ મળતાની સાથે જ દેવ કોરડિયા ઉત્સાહભેર પોતાનું ફોર્મ ભરવા માટે પણ પહોંચી ગયા હતા. જોકે, રાજકારણમાં પલટો આવતા વાર લાગતી નથી અને આ બેઠક પર પણ એવું જ કંઈક જોવા મળ્યું હતું.

ફોર્મ ભરવાની છેલ્લી ઘડીએ પક્ષના મોવડી મંડળ દ્વારા અણધાર્યો નિર્ણય લેવામાં આવ્યો અને દેવ કોરડિયાની ટિકિટ કાપી તેમના સ્થાને કુવાડવા ગામના સ્થાનિક અને સક્રિય સરપંચ સંજય પીપળીયાને પક્ષના સત્તાવાર ઉમેદવાર તરીકે મેદાનમાં ઉતારી ફોર્મ ભરાવવામાં આવ્યું હતું. છેલ્લી ઘડીએ ટિકિટ મળ્યા બાદ સંજય પીપળીયા આ બેઠક પરથી ભવ્ય વિજય મેળવીને જિલ્લા પંચાયતમાં પહોંચ્યા હતા. પક્ષ પ્રત્યેની તેમની નિષ્ઠા અને સ્થાનિક સ્તરે તેમની મજબૂત પકડને ધ્યાને રાખીને જ આજે જિલ્લા ભાજપ દ્વારા તેમને રાજકોટ જિલ્લા પંચાયતના સર્વોચ્ચ એવા પ્રમુખ પદના તાજથી પણ નવાજવામાં આવ્યા છે.

બીજી તરફ ઉપપ્રમુખ તરીકે પસંદ કરાયેલા સામત બાંભવા કોલીથડ બેઠક પરથી ચૂંટાઈને આવ્યા છે અને સંગઠનમાં લાંબો અનુભવ ધરાવે છે. પ્રમુખ અને ઉપપ્રમુખના નામોની સત્તાવાર જાહેરાત થતાં જ જિલ્લા પંચાયત કચેરી ખાતે ભારે ઉત્સાહનો માહોલ જોવા મળ્યો હતો. આ નવી વરણીઓ સાથે રાજકોટ જિલ્લા પંચાયતના શાસનનું નવું માળખું આકાર લઈ ચૂક્યું છે.

રાજકોટ જિલ્લા પંચાયતના પ્રમુખ સંજય પીપળીયાએ જણાવ્યું હતું કે, આગામી સમયમાં જિલ્લાના છેવાડાના ગામોનો વિકાસ કરવો અને પૂર્વ સરકારના અધૂરા રહેલા વિકાસ કાર્યોને પૂર્ણ કરવા તે તેમની પ્રાથમિકતા રહેશે.