રાજકોટ મનપાની લાલ આંખ: ૨૦ દિવસના મેગા ચેકિંગમાં ૧૧૦૦ વેપારીઓ રડારમાં, ૨૮ પેઢીઓ સીલ અને ૭ લાખનો દંડ
નાગરિકોના સ્વાસ્થ્ય સાથે ચેડાં કરનારા વેપારીઓમાં ફફડાટ: ૩૧૦ આસામીઓને કારણદર્શક નોટિસ ફટકારાઈ
ચેકિંગ દરમિયાન સાડા પાંચ ટનથી વધુ વાસી અને અખાદ્ય સામગ્રીનો જથ્થો જપ્ત કરી નાશ કરાયો
અગ્ર ગુજરાત, રાજકોટ
રાજકોટ શહેરમાં નાગરિકોના સ્વાસ્થ્ય સાથે ચેડાં કરનારા અને બેદરકાર આસામીઓ સામે રાજકોટ મહાનગરપાલિકાના આરોગ્ય વિભાગે કડક મિજાજ અપનાવ્યો છે. છેલ્લા ૨૦ દિવસથી શહેરના ત્રણેય ઝોનમાં એકસાથે આક્રમક મેગા ચેકિંગ ડ્રાઈવ શરૂ કરવામાં આવી છે. આ સઘન ઝુંબેશ અંતર્ગત આરોગ્ય વિભાગની ટીમોએ ખાદ્ય સામગ્રીનું વેચાણ કરતા ૧૧૦૦ થી વધુ એકમો પર ઓચિંતી તપાસ હાથ ધરી હતી. જેમાં ગંભીર ક્ષતિઓ અને આરોગ્યના નિયમોનું ઉલ્લંઘન બદલ ૩૧૦ પેઢીઓને કારણદર્શક નોટિસ ફટકારવામાં આવી છે, જ્યારે સરેઆમ નિયમભંગ કરનારી ૨૮ જેટલી પેઢીઓને તાત્કાલિક અસરથી સીલ કરી દેવાઈ છે.
તંત્ર દ્વારા કરવામાં આવેલી આ આકરી કાર્યવાહીમાં આરોગ્યના નિર્ધારિત ધોરણોનું પાલન ન કરનાર વેપારીઓ પાસેથી કાયદાકીય જોગવાઈઓ હેઠળ આશરે ૭ લાખ રૂપિયા જેટલી માતબર રકમનો દંડ વસૂલવામાં આવ્યો છે. આરોગ્ય વિભાગની ટીમોએ જ્યારે શહેરની વિવિધ હોટલો, રેસ્ટોરન્ટ્સ અને અન્ય ખાદ્ય પદાર્થોના એકમોમાં ઝીણવટભરી તપાસ કરી, ત્યારે ત્યાં અસહ્ય ગંદકી અને ખાદ્ય સામગ્રીની ગુણવત્તામાં ગંભીર ખામીઓ જોવા મળી હતી.
મનપાના આ અભિયાનનો મુખ્ય ઉદ્દેશ્ય લોકોને શુદ્ધ, સાત્વિક અને ગુણવત્તાયુક્ત આહાર મળી રહે તે સુનિશ્ચિત કરવાનો છે. ચેકિંગ દરમિયાન ખાસ કરીને અખાદ્ય, વાસી અને ભેળસેળયુક્ત ખાદ્ય પદાર્થોને સ્થળ પર જ જપ્ત કરવામાં આવ્યા હતા. આ દરોડા દરમિયાન કુલ સાડા પાંચ ટનથી વધુ અખાદ્ય અને વાસી સામગ્રીનો જથ્થો પકડી પાડી, તંત્ર દ્વારા તેનો જાહેરમાં નાશ કરવાની કાર્યવાહી કરવામાં આવી છે.
મહાનગરપાલિકાના આ કડક અને અભૂતપૂર્વ પગલાંથી શહેરના ખાદ્ય ચીજવસ્તુઓના વેપારી વર્ગમાં ભારે ફફડાટ વ્યાપી ગયો છે. આરોગ્ય વિભાગના ઉચ્ચ અધિકારીઓએ સ્પષ્ટ ચેતવણી આપતા જણાવ્યું છે કે, ભવિષ્યમાં પણ આવી આકસ્મિક તપાસ અને ડ્રાઈવ સતત ચાલુ રાખવામાં આવશે. જે પણ એકમ આરોગ્યના ધોરણો જાળવવામાં નિષ્ફળ જશે, તેમની સામે લાયસન્સ રદ્દ કરવા સહિતની વધુ કડક કાનૂની કાર્યવાહી કરવામાં આવશે. નાગરિકોના આરોગ્યની સુરક્ષા માટે તંત્ર કોઈ પણ પ્રકારની બાંધછોડ કરવાના મૂડમાં નથી તે આ મેગા ચેકિંગ દ્વારા સાબિત થયું છે.
