રાજકોટ નમપા સંચાલિત ૩ અંગ્રેજી માધ્યમની શાળાઓના ૯૦૦થી વધુ બાળકોનું ભવિષ્ય જોખમમાં: સંચાલન બદલાવાની ચર્ચાથી વાલીઓમાં રોષ
SNK ગ્રૂપ પાસે જ સંચાલન યથાવત રાખવા ૨૦૦થી વધુ વાલીઓએ શિક્ષણ સમિતિના ચેરમેન અને મેયરને કરી રજૂઆત
અગ્ર ગુજરાત, રાજકોટ
રાજકોટ મહાનગરપાલિકા સંચાલિત નગર પ્રાથમિક શિક્ષણ સમિતિ હેઠળ ચાલતી ત્રણ અગ્રણી ઈંગ્લિશ મીડિયમ શાળાઓના સંચાલન મુદ્દે મોટો વિવાદ ઊભો થયો છે. કવિ શ્રી નર્મદ ઈંગ્લિશ મીડિયમ સ્કૂલ, રવિન્દ્રનાથ ટાગોર ઈંગ્લિશ મીડિયમ સ્કૂલ અને ડો. હોમી જહાંગીર ભાભા ઈંગ્લિશ મીડિયમ સ્કૂલનું સંચાલન કરી રહેલા JHP એજ્યુકેશન ફાઉન્ડેશન (TGES, SNK GROUP) પાસેથી સંચાલન પરત લેવાની કે બદલવાની ચર્ચાઓ વહેતી થતાં વાલીઓમાં ચિંતા અને અસંતોષ વ્યાપી ગયો છે. આ નિર્ણયના વિરોધમાં ૨૦૦થી વધુ વાલીઓ નગર પ્રાથમિક શિક્ષણ સમિતિના ચેરમેન વિક્રમ પૂજારા અને મેયર ડો. નેહલ શુક્લને રૂબરૂ મળ્યા હતા અને શાળાઓનું સંચાલન SNK ગ્રૂપ પાસે જ યથાવત રાખવા માટે આવેદનપત્ર પાઠવ્યું હતું.
વાલીઓએ રજૂઆત કરતાં જણાવ્યું હતું કે આ ત્રણેય શાળાઓમાં ગરીબ અને મધ્યમ વર્ગના ૯૦૦થી વધુ બાળકો અભ્યાસ કરી રહ્યા છે. SNK ગ્રૂપ દ્વારા અહીં ગુણવત્તાસભર અને આંતરરાષ્ટ્રીય સ્તરનું શિક્ષણ મફતમાં પૂરું પાડવામાં આવી રહ્યું છે. શૈક્ષણિક સત્રની વચ્ચે સંચાલન કે શિક્ષકો બદલવાથી બાળકોના અભ્યાસ અને માનસિક સ્વાસ્થ્ય પર પ્રતિકૂળ અસર પડશે. આ વર્ષે નર્સરીમાં પણ નવા એડમિશન ન અપાતા આખી સિસ્ટમ ખોરવાઈ જવાનો ભય વાલીઓએ વ્યક્ત કર્યો છે.
સમગ્ર મામલે નગર પ્રાથમિક શિક્ષણ સમિતિના ચેરમેન વિક્રમ પૂજારાએ સ્પષ્ટતા કરતાં જણાવ્યું હતું કે, SNK ગ્રૂપ લાંબા સમયથી પ્રશંસનીય સેવા આપી રહ્યું છે. પરંતુ ગ્રૂપના મુખ્ય સંચાલક કિરણભાઈની નાદુરસ્ત તબિયતના કારણે તેમણે પોતે જ ગત વર્ષે આ જવાબદારીમાંથી મુક્તિ માંગી હતી.
તેમણે વધુમાં ઉમેર્યું કે, સંચાલકો આગળ જવાબદારી સંભાળવા તૈયાર ન હોવાથી સરકારે અલગ મહેકમ મંજૂર કર્યું છે. તાત્કાલિક ધોરણે સરકારી શિક્ષકોની ભરતી કરીને બાળકોના અભ્યાસમાં કોઈ રુકાવટ નહીં આવવા દેવાય. આ ઉપરાંત, જો SNK ગ્રૂપ અથવા અન્ય કોઈ સારું ગ્રૂપ સંચાલન લેવા તૈયાર થશે તો તે માટે પણ સમિતિ પ્રયાસ કરશે.
