દુષ્કર્મ કેસ બાદ બદલો લેવા શિક્ષિકાના અશ્લીલ ફોટા વાયરલ કરનાર સામે વધુ એક ગુનો
લગ્નના વચનો આપી શારીરિક સંબંધ બાંધ્યા બાદ યુવાને કર્યો દગો; ફરીયાદ નોંધાતા સોશિયલ મીડિયામાં અર્ધનગ્ન તસવીરો, મોબાઇલ નંબર અને બેંક વિગતો જાહેર કરી ધમાલ મચાવી
અગ્ર ગુજરાત, રાજકોટ
રાજકોટ શહેરમાં એક ગંભીર અને સંવેદનશીલ બનાવ સામે આવ્યો છે, જેમાં દુષ્કર્મની ફરીયાદ નોંધાવનાર શિક્ષિકાને ટાર્ગેટ બનાવી આરોપીએ બદલો લેવા અશ્લીલ ફોટા અને અંગત વિગતો સોશિયલ મીડિયા પર વાયરલ કરી દીધી હોવાનું સામે આવ્યું છે. આ ઘટનાને લઈ ગાંધીગ્રામ પોલીસ મથકમાં મવડી વિસ્તારના રહેવાસી ધ્રુવલ દેસાઈ સામે વધુ એક ગુનો નોંધાયો છે અને પોલીસ દ્વારા તેની શોધખોળ શરૂ કરવામાં આવી છે.
મળતી માહિતી મુજબ, રૈયા રોડ વિસ્તારમાં રહેતી 38 વર્ષીય શિક્ષિકાએ અગાઉ ધ્રુવલ દેસાઈ વિરુદ્ધ દુષ્કર્મ અને છેતરપીંડીની ફરિયાદ નોંધાવી હતી. ફરિયાદ નોંધાતા આરોપી ભડકાઈ ગયો હતો અને તેણે આત્મહત્યાનો નાટક રચી શિક્ષિકાને બદનામ કરવાનો પ્રયાસ કર્યો હતો. સોશિયલ મીડિયા પ્લેટફોર્મ પર અપલોડ કરાયેલા વીડિયોમાં આરોપી ફિનાઇલ પીતો દેખાય છે, ત્યારબાદ તેણે શિક્ષિકાના અર્ધનગ્ન ફોટા, ખાનગી ક્ષણોના દૃશ્યો, મોબાઇલ નંબર અને બેંક એકાઉન્ટની વિગતો જાહેર કરી દીધી હતી.
ફરિયાદમાં જણાવ્યા મુજબ, પીડિતા હાલમાં એકલી રહે છે અને ગૃહિણિ તરીકે જીવન વિતાવે છે. વર્ષ 2006માં તેણીના લગ્ન થયા હતા, પરંતુ દાંપત્ય જીવનમાં મતભેદ સર્જાતા વર્ષ 2022માં છૂટાછેડા લીધા હતા. તેમનો એક પુત્ર છે, જે પતિ સાથે રહે છે. પીડિતાના માતા-પિતા જુનાગઢમાં નિવૃત જીવન જીવે છે.
ઘટનાની પૃષ્ઠભૂમિ તપાસતા જાણવા મળ્યું કે વર્ષ 2012-13 દરમિયાન પીડિતા એક ખાનગી શાળામાં શિક્ષિકા તરીકે ફરજ બજાવતી હતી, ત્યારે ધ્રુવલ દેસાઈ તે જ શાળામાં વિદ્યાર્થી હતો. બંને વચ્ચે તે સમયે માત્ર ઓળખાણ હતી અને ખાસ કોઈ સંપર્ક નહોતો. જોકે વર્ષ 2024 દરમિયાન ધ્રુવલે ફેસબુક મારફતે ફરી સંપર્ક સાધ્યો અને ત્યારબાદ બંને વચ્ચે વાતચીત શરૂ થઈ. ધીમે ધીમે આ ઓળખાણ નજીકના સંબંધમાં ફેરવાઈ અને બંને વચ્ચે મુલાકાતો તેમજ બહાર ફરવા જવાનું શરૂ થયું.
ફરીયાદ અનુસાર, આ સમયગાળા દરમિયાન ધ્રુવલે શિક્ષિકાને લગ્ન કરવાની લાલચ આપી હતી. આ વિશ્વાસમાં આવી પીડિતાએ તેની સાથે અનેક વખત શારીરિક સંબંધ બાંધ્યા હતા. લગભગ દોઢ વર્ષ સુધી ચાલેલા આ સંબંધ દરમિયાન શિક્ષિકાને આશા હતી કે બંને લગ્ન કરશે. પરંતુ આરોપીએ અચાનક સંબંધ તોડી અન્ય યુવતી સાથે સગાઈ કરી લગ્ન કરી લીધા હતા, જેના કારણે પીડિતાએ તા. 23 માર્ચ 2026ના રોજ ગાંધીગ્રામ પોલીસ મથકમાં દુષ્કર્મ અને છેતરપીંડીની ફરિયાદ નોંધાવી હતી.
ફરીયાદ નોંધાયા બાદ પરિસ્થિતિ વધુ વિકરાળ બની ગઈ હતી. તા. 27 માર્ચે પીડિતા પોતાના ઘરે હતી ત્યારે સોશિયલ મીડિયા પર એક વીડિયો જોવા મળ્યો, જેમાં આરોપી પોતાની નિર્દોષતા સાબિત કરવાનો પ્રયાસ કરતો હતો. આ વીડિયોમાં આરોપીએ પોતાની અને પીડિતાની વચ્ચે થયેલા વોટ્સઅપ ચેટના સ્ક્રીનશોટ, અંગત ફોટા તેમજ પીડિતાની ખાનગી માહિતી જાહેર કરી હતી. આ સાથે પીડિતાના મોબાઇલ નંબર જાહેર થતા અજાણ્યા લોકોના કોલ અને મેસેજથી તેણીનું જીવન દુર્ભર બની ગયું હતું.
આ બનાવને લઈને પીડિતાએ પોતાના પરિવારજનો અને ઓળખીતાઓ સાથે ચર્ચા કર્યા બાદ ફરી ગાંધીગ્રામ પોલીસ મથકમાં બીજી ફરિયાદ નોંધાવી હતી. પોલીસે આઈટી એક્ટ સહિતની સંબંધિત કલમો હેઠળ ગુનો નોંધી તપાસ હાથ ધરી છે. હાલ આરોપી ફરાર હોવાનું માનવામાં આવે છે અને તેની ધરપકડ માટે પોલીસે અલગ અલગ ટીમો બનાવી શોધખોળ શરૂ કરી છે.
