ફાઇનલ મેચમાં મહાનુભાવોની હાજરીના કારણે થ્રી-લેયર સિક્યોરિટી બંદોબસ્ત

• વડા પ્રધાન નરેન્દ્ર મોદી, ઓસ્ટ્રેલિયના ડેપ્યુટી પીએમ સહિતની ઉપસ્થિતિ
• ફાઈનલ મેચ માટે ડ્રોન અને એન્ટિ ડ્રોન સિસ્ટમ
  
• પાંચ હજાર જવાનો સુરક્ષા બંદોબસ્ત માટે તહેનાત
  

ભારત ઓસ્ટ્રેલિયા વચ્ચે રવિવારે નરેન્દ્ર મોદી સ્ટેડિયમમાં રમાનારી ક્રિકેટ વર્લ્ડકપની ફાઈનલ મેચમાં પીએમ નરેન્દ્ર મોદી સહિતના મહાનુભાવો તેમજ વિદેશી મહેમાનો હાજર રહેવાના હોઈ શહેર પોલીસે થ્રી લેયર બંદોબસ્ત ગોઠવવાનું આયોજન કર્યું છે. આ ઉપરાંત ડ્રોન, એન્ટિ ડ્રોન સિસ્ટમ તેમજ સઘન ચેકિંગ પોઈંટ પોલીસ દ્વારા ગોઠવવામાં આવનાર છે. આરએએફની કંપની સહિત પાંચ હજાર પોલીસ જવાનો બંદોબસ્તમાં ખડેપગે તહેનાત રહેશે.

નરેન્દ્ર મોદી સ્ટેડિયમમાં વર્લ્ડકંપની ફાઈનલ મેચને લઈને સ્ટેડિયમ ફરતે પોલીસના પાંચ હજાર જવાનો બંદોબસ્તમાં તહેનાત રાખવાનું આયોજન પોલીસ દ્વારા ગોઠવવામાં આવ્યું છે. આ ઉપરાંત શહેરના વિવિધ માર્ગો પર પોલીસના પોઈંટ ગોઠવવામાં આવશે. ફાઈનલ મેચમાં પીએમ નરેન્દ્ર મોદી સહિતના રાજકીય મહાનુભાવો, વિદેશી મહાનુભાવો તેમજ ફિલ્મી હસ્તીઓ હાજર રહેનાર હોઈ પોલીસ થ્રી લેયર બંદોબસ્તનું આયોજન કર્યું છે. જે મુજબ સ્ટેડિયમમાં પ્રવેશતા પહેલા જૂદા જૂદા ચેકિંગ પોઈંટો પરથી લોકોએ પસાર થવું પડશે. આ ઉપરાંત ડ્રોન સિસ્ટમ ગોઠવવામાં આવી છે. સ્ટેડિયમ ફરતે પોલીસ ડ્રોન દ્વારા આસપાસના વિસ્તારો અને સ્ટેડિયમમાં નજર રાખવામાં આવશે તેમજ શંકાસ્પદ હિલચાલ ઝડપી લેવામાં આવશે. આ ઉપરાંત આરએએફ તેમજ એસઆરપીની 3 કંપનીઓ બંદોબસ્તમાં ગોઠવવામાં આવશે તેમ સિનિયર અધિકારીઓએ જણાવ્યું હતું. આ ઉપરાંત બોડી ઓન કેમેરા સાથે પોલીસ જવાનોને બંદોબસ્તમાં રહેશે. જેના કારણે શંકાસ્પદ વ્યક્તિઓની હિલચાલ પર નજર રાખી શકાય.

શહેર પોલીસના સીપી, જેસીપી, 19 ડીસીપી કક્ષાના અધિકારીઓ સ્ટેડિયમ પર હાજર રહીને બંદોબસ્તનું મોનિટરિંગ કરશે તેમજ પોલીસ કર્મચારીઓને સુચના આપશે. આ ઉપરાંત 41 એસીપી, 112 પીઆઈ અને 320 પીએસઆઈ કક્ષાના અધિકારીઓ બંદોબસ્તમાં હાજર રહેશે. શહેરના કુલ પાંચ હજાર જેટલા પોલીસ અને ટ્રાફિક પોલીસના જવાનો તેમજ 500 હોમગાર્ડ જવાન બંદોબસ્તમાં હાજર રહેવાના છે. આ ઉપરાંત ટ્રાફિકના નિયમન માટે ટ્રાફિક પોલીસ દ્વારા અલગ વ્યવસ્થા ગોઠવવામાં આવી છે. વીઆઈપી પાર્કિગની વ્યવસ્થા પોલીસ દ્વારા અલગથી કરવામાં આવી છે.

તિથર્ડ ડ્રોન અને એન્ટિ ડ્રોન ગનની મદદ લેવાશે

શહેર પોલીસ દ્વારા 12 કલાક સુધી 120 મીટરની ઊંચાઈ સુધી ઉડી શકે તેવા તિથર્ડ ડ્રોનની મદદ ફાઈનલ મેચના બંદોબસ્ત દરમિયાન લેવામાં આવશે. આ ડ્રોન સ્ટેડિયમ આસપાસના પાંચ કિલોમીટર સુધીના વિસ્તાર પર વોચ રાખશે. ડ્રોનમાં કોઈ શંકાસ્પદ વ્યક્તિ કે વસ્તુ કેદ થશે તો તત્કાળ પોલીસ જવાનોને જાણ કરીને કાર્યવાહી કરવા માટે સૂચના આપવામાં આવશે. આ ઉપરાંત એન્ટિ ડ્રોન ગનની મદદ પણ બંદોબસ્તમાં લેવામાં આવશે.