જૈન દીક્ષા લેનાર બે મુમુક્ષુ વિદ્યાર્થિનીઓનું મુંબઈની સોમૈયા યુનિવર્સિટીમાં સન્માન
મુમુક્ષુ જાનવી શાહ અને મુમુક્ષુ યશવી મહેતા સાંસારિક જીવનનો ત્યાગ કરી સંયમના માર્ગે પ્રયાણ કરશે; વાઇસ ચાન્સેલર સહિત અધ્યાપકોએ અભિવાદન કરી અનુમોદના પાઠવી
અગ્ર ગુજરાત, રાજકોટ
મુંબઈની પ્રતિષ્ઠિત કે. જે. સોમૈયા ઇન્સ્ટિટ્યૂટ ઑફ ધર્મ સ્ટડીઝ (સોમૈયા વિદ્યાવિહાર યુનિવર્સિટી) ખાતે એક અત્યંત ગૌરવપૂર્ણ અને મંગલમય કાર્યક્રમ યોજાયો હતો. યુનિવર્સિટીના ધર્મ અભ્યાસ વિભાગમાં જૈન ધર્મનો ઊંડો અભ્યાસ કરનાર મુમુક્ષુ જાનવી શાહ અને મુમુક્ષુ યશવી મહેતા હવે સાંસારિક સુખોનો ત્યાગ કરી જૈન દીક્ષા અંગીકાર કરવા જઈ રહ્યાં છે. બંને વિદ્યાર્થિનીઓના આ પવિત્ર અને અડગ સંકલ્પને બિરદાવતાં યુનિવર્સિટીના અધ્યાપકો દ્વારા તેમનું વિશેષ સન્માન કરવામાં આવ્યું હતું.
આ સન્માન સમારોહમાં યુનિવર્સિટીના અજય કપૂરજી (વાઇસ ચાન્સેલર, સોમૈયા વિદ્યાવિહાર યુનિવર્સિટી), નિમિત શેઠજી (ગવર્નિંગ બોડી સભ્ય), નંદકુમાર ગિલકેજી (રજિસ્ટ્રાર), પલ્લવીજી (વડાં, ધર્મ અભ્યાસ વિભાગ) સહિતના ઉચ્ચ પદાધિકારીઓ, અધ્યાપકો અને વિદ્યાર્થીઓ મોટી સંખ્યામાં ઉપસ્થિત રહ્યા હતા.
આ પ્રસંગે અધ્યાપકોએ બંને મુમુક્ષુઓના ત્યાગ અને વૈરાગ્ય પ્રત્યેના સમર્પણની પ્રશંસા કરતાં ગૌરવ અને કૃતજ્ઞતાની લાગણી વ્યક્ત કરી હતી. શિક્ષણ દ્વારા મેળવેલા જ્ઞાનને જ્યારે વિદ્યાર્થીઓ જીવનમાં આત્મસાત્ કરીને ત્યાગ, વૈરાગ્ય અને સંયમના સર્વોચ્ચ માર્ગે આગળ વધવાનો સંકલ્પ કરે, ત્યારે તે સમગ્ર શૈક્ષણિક સંસ્થા માટે એક અવિસ્મરણીય અને પ્રેરણાદાયી ક્ષણ બની રહે છે. ઉપસ્થિત સૌએ બંને મુમુક્ષુઓની આધ્યાત્મિક યાત્રાને હૃદયપૂર્વક અનુમોદના અર્પણ કરી હતી.


