શાપરની 2.49 કરોડની સનસનીખેજ લૂંટનો ભેદ ઉકેલાયો, આંતરરાજ્ય ગેંગના ત્રણ સાગરીતો સકંજામાં
ગ્રામ્ય પોલીસની પાંચ દિવસની મેરેથોન તપાસ સફળ, આરોપીઓને રાજકોટ લાવવાની કાર્યવાહી શરૂ; અન્ય આરોપીઓ અને મુદામાલની શોધખોળ યથાવત
અગ્ર ગુજરાત, રાજકોટ
શાપર-વેરાવળ ઔદ્યોગિક વિસ્તારમાં પાંચ દિવસ પહેલાં બનેલી રૂ.2.49 કરોડની હાઈપ્રોફાઇલ લૂંટની ઘટનાનો ભેદ ઉકેલવામાં રાજકોટ ગ્રામ્ય પોલીસને મહત્વપૂર્ણ સફળતા મળી હોવાનું જાણવા મળ્યું છે. પોલીસ સૂત્રોના જણાવ્યા મુજબ આંતરરાજ્ય લૂંટારુ ગેંગ સાથે સંકળાયેલા ત્રણ શખ્સોને સકંજામાં લેવામાં આવ્યા છે અને તેમની પાસેથી વધુ માહિતી મેળવવા રાજકોટ લાવવાની તજવીજ ચાલી રહી છે. સાથે જ લૂંટમાં સંડોવાયેલા અન્ય આરોપીઓની શોધખોળ તેમજ કરોડો રૂપિયાના મુદામાલની વસૂલાત માટે પણ અલગ-અલગ ટીમો સક્રિય બની છે. સમગ્ર કેસ અંગે પોલીસ ટૂંક સમયમાં સત્તાવાર ખુલાસો કરે તેવી શક્યતા વ્યક્ત કરવામાં આવી રહી છે.
ગત શુક્રવારની મધરાત્રિ બાદ બનેલી આ ઘટનાએ સમગ્ર રાજકોટ જિલ્લામાં ચકચાર મચાવી દીધી હતી. શાપરમાં રહેતા 77 વર્ષીય રાજવી જીતેન્દ્રસિંહ જાડેજાના નિવાસસ્થાને મધરાત્રિ બાદ હથિયારોથી સજ્જ અને ચહેરા ઢાંકીને આવેલા લૂંટારુઓ ઘરમાં ઘૂસી ગયા હતા. લૂંટારુઓએ સૌપ્રથમ વૃદ્ધને બંધક બનાવી તેમની હિલચાલ પર કાબૂ મેળવ્યો હતો. ત્યારબાદ ઘરમાં રાખેલી આશરે રૂ.2.47 કરોડની રોકડ રકમ, અંદાજે રૂ.2 લાખના દાગીના, લાઇસન્સવાળી રાયફલ અને મોબાઇલ ફોન સહિત કુલ રૂ.2.49 કરોડનો મુદ્દામાલ લૂંટી ફરાર થઈ ગયા હતા.
ઘટનાની ગંભીરતા ધ્યાનમાં લેતા રાજકોટ ગ્રામ્ય પોલીસ સહિત ઉચ્ચ અધિકારીઓ તરત જ હરકતમાં આવ્યા હતા. રેન્જ આઈજી નિર્લિપ્ત રાય અને જિલ્લા પોલીસ વડા વિજયસિંહ ગુર્જરે ઘટનાસ્થળની મુલાકાત લઈ તપાસની દિશા નક્કી કરી હતી. શરૂઆતથી જ આ કેસને પડકારરૂપ માની વિવિધ વિશેષ ટીમોને તપાસમાં જોડવામાં આવી હતી.
તપાસ દરમિયાન ડોગ સ્ક્વોડ, એફએસએલ અને ટેક્નિકલ સર્વેલન્સની મદદ લેવામાં આવી હતી. ઘટનાસ્થળેથી મળેલા પુરાવાઓનું વૈજ્ઞાનિક વિશ્લેષણ કરવામાં આવ્યું હતું. બીજી તરફ રૂરલ એલસીબી, એસઓજી, સ્થાનિક પોલીસ ઉપરાંત રેન્જ આઈજીની વિશેષ ટીમ અને રાજકોટ શહેર ક્રાઇમ બ્રાન્ચ પણ તપાસમાં જોડાઈ હતી. લૂંટારુઓએ કયા માર્ગનો ઉપયોગ કર્યો, ઘટનાના સમયગાળા દરમિયાન કયા મોબાઇલ નંબર સક્રિય હતા અને ઇન્ટરનેટ કોલિંગ સહિતના ડિજિટલ કમ્યુનિકેશનની પણ ઊંડાણપૂર્વક તપાસ કરવામાં આવી હતી.
પોલીસે ટેક્નિકલ સર્વેલન્સ, મોબાઇલ લોકેશન, શંકાસ્પદ હિલચાલ અને અન્ય ગુપ્ત માહિતીના આધારે તપાસને આગળ વધારી હતી. સતત પાંચ દિવસ સુધી વિવિધ રાજ્યોમાં તપાસનો વ્યાપ વધાર્યા બાદ પોલીસને મહત્વપૂર્ણ કડીઓ મળી હતી. જેના આધારે આંતરરાજ્ય ગેંગના ત્રણ સાગરીતોને ઝડપી લેવામાં આવ્યા હોવાનું સૂત્રો જણાવી રહ્યા છે.
હાલ ઝડપાયેલા શખ્સોની સઘન પૂછપરછ ચાલી રહી છે. પોલીસને આશા છે કે પૂછપરછ દરમિયાન લૂંટની સમગ્ર યોજના, તેમાં સામેલ અન્ય આરોપીઓની ભૂમિકા અને લૂંટાયેલા મુદ્દામાલ અંગે મહત્વપૂર્ણ વિગતો મળી શકશે. આ સાથે જ અન્ય ફરાર આરોપીઓ સુધી પહોંચવા માટે પણ અલગ-અલગ ટીમોને જવાબદારી સોંપવામાં આવી છે.
પોલીસ માટે હવે સૌથી મોટો પડકાર કરોડો રૂપિયાની રોકડ અને અન્ય લૂંટાયેલા સામાનની રિકવરી કરવાનો છે. સૂત્રોના જણાવ્યા મુજબ આરોપીઓના નિવેદનના આધારે વિવિધ સ્થળોએ દરોડાની કાર્યવાહી પણ હાથ ધરવામાં આવી રહી છે. જો તપાસમાં વધુ સફળતા મળે તો ટૂંક સમયમાં જ મોટા પ્રમાણમાં મુદ્દામાલ પણ કબજે થઈ શકે તેવી સંભાવના છે.
ગ્રામ્ય પોલીસ દ્વારા આ સમગ્ર કેસમાં નોંધપાત્ર પ્રગતિ નોંધાઈ હોવાનું માનવામાં આવી રહ્યું છે. જોકે, તપાસ હજુ ચાલુ હોવાથી અધિકારીઓ સત્તાવાર રીતે વધુ વિગતો જાહેર કરવાનું ટાળી રહ્યા છે. પોલીસ ટૂંક સમયમાં પત્રકાર પરિષદ યોજી સમગ્ર લૂંટકાંડનો ભેદ, આરોપીઓની ઓળખ, તેમની મોડસ ઓપરેન્ડી તેમજ મુદ્દામાલની રિકવરી અંગે વિગતવાર માહિતી જાહેર કરે તેવી શક્યતા છે. શાપરની આ કરોડોની લૂંટનો ભેદ ઉકેલાતા પોલીસ તંત્રને મોટી સફળતા મળી હોવાનું માનવામાં આવી રહ્યું છે. હવે સૌની નજર પોલીસના સત્તાવાર ખુલાસા અને બાકીના આરોપીઓની ધરપકડ તેમજ લૂંટાયેલા મુદ્દામાલની સંપૂર્ણ વસૂલાત પર કેન્દ્રિત થઈ છે.
