- અમદાવાદમાં વહેલી સવારથી અનેક વિસ્તારોમાં વરસાદ
- ઓફિસ જવાના સમયે વરસાદ વધારે આવતા લોકો હેરાન
- વરસાદના કારણે શહેરમાં અનેક જગ્યાએ ટ્રાફિકજામના દ્રશ્યો
અમદાવાદ શહેરમાં વહેલી સવારથી વરસાદ મનમૂકીને વરસી રહ્યો છે,ત્યારે સમગ્ર અમદાવાદમાં વરસાદી માહોલ થતા લોકોને ગરમીના બફારામાંથી રાહત મળી હતી,ત્યારે અમદાવાદ હવામાન વિભાગે નાઉકાસ્ટ બુલેટીન જાહેર કર્યુ છે જેમાં અગામી 3 કલાક વરસાદની ભારે આગાહી કરવામાં આવી છે,ત્યારે આજે અમદાવાદમાં ભારે વરસાદ થવાની શકયતાઓ રહેલી છે.
શહેરમાં પાણી ભરાવાની થઈ શરૂઆત
અમદાવાદમાં હજી સામન્ય વરસાદમાં પાણી ભરાવાની શરૂઆત થઈ છે ત્યારે સોલા અને ઘાટલોડીયાના ચાણકયપુરીમાં વરસાદી પાણી ભરાવાની શરૂઆત થતા સ્થાનિકો હેરાન થઈ ગયા છે,કોર્પોરેશનના પ્રિ-મોન્સૂન પ્લાન પર પાણી ફરી વળ્યું છે.શહેરીજનોને ભરાયેલા પાણીમાંથી પસાર થવાનો વારો આવ્યો છે,એક તરફ વરસાદ અને બીજી તરફ ટ્રાફિકની સમસ્યાથી શહેરીજનો ત્રાહિમામ પોકારી ઉઠયા છે.
રાજયમાં ફરી જામ્યો વરસાદી માહોલ
સવારે 6 થી 8 વાગ્યા સુધી ગુજરાતમાં 119 તાલુકાઓમાં વરસાદ નોંધાયો છે.સૌથી વધુ વરસાદ લુણાવાડામાં 4 ઇંચ,મોડાસામાં 2 ઇંચ, મેઘરજમાં 2 ઇંચ વરસાદ,ખાનપુરમાં પોણા બે ઇંચ, વિરપુરમાં 1.5 ઇંચ વરસાદ,ક્વાંટમાં 1.5 ઇંચ, દહેગામમાં 1 ઇંચ,માલપુર અને બાયડમાં 1-1 ઇંચ,છોટાઉદેપુરમાં 1 ઇંચ વરસાદ નોંધાયો છે.
અમદાવાદમાં હજી જોઈએ એવો વરસાદ નથી નોંધાયો
સૌરાષ્ટ્ર અને દક્ષિણ ગુજરાતમાં જે રીતે વરસાદ નોંધાયો છે તેવો વરસાદી માહોલ હજી અમદાવાદમાં થયો નથી અમદાવાદમાં જોઈએ તે રીતે વરસાદ પડયો નથી થોડો થોડો વરસાદ અમદાવાદને હાથતાળી આપીને જતો રહે છે ત્યારે અમદાવાદીઓ પણ ઈચ્છે છે કે અમદાવાદમાં સારો વરસાદ આવે તો લોકોને ગરમીના બફારામાંથી રાહત મળે સાથે સાથે અમદાવાદના ગ્રામ્ય વિસ્તારના ખેડૂતોને પણ વરસાદથી પાકને નવજીવન મળશે.
