લોકસભા-ચૂંટણીમાં ઘેર બેઠા કઈ રીતે મતદાન-કરી શકશો,કોને અને કઈ રીતે મળશે સુવિધા

• 85 વર્ષથી ઉપરની વયના વૃદ્ધો અને દિવ્યાંગ ઘેર બેઠા મતદાન કરી શકશે
• સાત તબક્કામાં મતદાન હાથ ધરાવાનું છે
  
• દિવ્યાંગો પાસે 40 ટકાથી વધુ ડિસેબિલિટી હોવાનું પ્રમાણપત્ર હોવું જરૂરી છે
  

લોકસભા ચૂંટણીનું રણશિંગું ફૂંકાઈ ચૂક્યું છે. સાત તબક્કામાં મતદાન હાથ ધરાવાનું છે. પ્રથમ તબક્કામાં 19મેના રોજ મતદાન થશે. ચૂંટણી પંચ તૈયારીઓને આખરી ઓપ આપવાના કામે લાગ્યું છે. ચૂંટણી પંચે લોકસભાની આ ચૂંટણીમાં વોટ ફ્રોમની સુવિધા પણ આપી છે. લોકસભા ચૂંટણીમાં પહેલી જ વાર 85 વર્ષથી ઉપરની વયના વૃદ્ધો અને દિવ્યાંગ ઘેર બેઠા મતદાન કરી શકશે. આ સુવિધાનો લાભ લેવા શું કરવું પડશે તે વિશે અહીં જાણકારી આપવામાં આવી છે.

વોટ ફ્રોમ હોમની સુવિધાનો લાભ માત્ર 85 વર્ષથી ઉપરની વયના વૃદ્ધો અને 40 ટકાથી વધુ ડિસેબિલિટી ધરાવતા દિવ્યાંગો માટે છે. તેઓ ઘેર બેઠા મતાધિકારનો ઉપયોગ કરી શકશે. મુખ્ય ચૂંટણી કમિશનર રાજીવકુમારે જણાવ્યા મુજબ દિવ્યાંગ વ્યક્તિ પાસે આ હેતુસર તેમનું ડિસેબિલિટી પ્રમાણપત્ર હોવું જરૂરી છે. પ્રમાણપત્રમાં 40 ટકાથી વધુ ડિસેબિલિટી હોવાનો ઉલ્લેખ હશે તો જ તેમને વોટ ફ્રોમ હોમ સુવિધાનો લાભ મળશે.

કઈ રીતે સુવિધાનો લાભ લઈ શકાશે?

જે વૃદ્ધો કે દિવ્યાંગ મતદારને ઘેર બેઠા મતદાન સુવિધાનો લાભ લેવો હોય તેમણે ચૂંટણી પંચના સક્ષમ એપ પર આ વિકલ્પની પસંદગી કરવી પડશે. એપ પર પોતાની માહિતી અને મુશ્કેલીઓ પણ વર્ણવવી પડશે. દિવ્યાંગતાનો ઉલ્લેખ કરવો પડશે. ચૂંટણી પંચનું કહેવું છે કે લોકસભા ચૂંટણી શરૂ થતાં પહેલાં પ્રત્યેક લોકસભા વિસ્તારમાં 85 વર્ષથી વધુ વય ધરાવતા વૃદ્ધો અને દિવ્યાંગ મતદારોના નિવાસે ફોર્મ મોકલી દેવામાં આવશે. બીએલઓ આવા મતદારોની વિગતો ધરાવતા હોય છે. બીએલઓ તેમના ઘેર જઈને પૂછશે કે મતદાન કેન્દ્ર પહોંચીને મતદાન કરવા ઇચ્છે છે કે ઘેર બેઠા ? જો જરૂરી ઔપચારિકતા પૂરી કરવામાં આવશે તો ઘેર બેઠા મતદાન માટે તેમની પાસેથી ફોર્મ 12ડી ભરાવવામાં આવશે.

મતદાન કેન્દ્ર ખાતે વ્હીલચેરની સુવિધા મળશે

ચૂંટણી પંચના જણાવ્યા મુજબ 85 વર્ષથી ઓછી ઉંમર ધરાવતા વૃદ્ધ મતદારો માટે મતદાન કેન્દ્ર ખાતે ખાસ વ્યવસ્થા રહેશે. વ્હીલચેરથી માંડીને ચૂંટણી પંચના વોલિન્ટિયર્સ તેમને મતદાનમાં મદદ કરશે. જે દિવ્યાંગ મતદારો પોલિંગ બૂથ સુધી પહોંચવા અસમર્થ હોય તેમના માટે ટ્રાન્સપોર્ટની વ્યવસ્થા ઉપલબ્ધ કરાવવામાં આવશે.

85 વર્ષથી મોટી ઉંમરના 82 લાખ મતદાર

ચૂંટણી પંચના જણાવ્યા મુજબ દેશભરમાં કે જેમની ઉંમર 85 વર્ષથી વધુ હોય તેવા 82 લાખ મતદારો છે. 2.8 લાખ મતદારો 100 વર્ષથી વધુ ઉંમર ધરાવે છે. દેશમાં 49.7 કરોડ પુરુષ મતદારો, 47.01 કરોડ મહિલા મતદારો તો 48,000 ટ્રાન્સજેન્ડર મતદારો પણ છે.

મતદાનની તારીખો

 વર્ષ 2024ની લોકસભા ચૂંટણીમાં 1.8 કરોડ મતદારો પહેલી જ વાર પોતાના મતાધિકારનો ઉપયોગ કરશે. પ્રથમ ચરણ માટે 19 એપ્રિલના રોજ મતદાન થશે. બીજા તબક્કા માટે 26 એપ્રિલ, ત્રીજા તબક્કા માટે 7મે, ચોથા તબક્કા માટે 13મે, પાંચમા તબક્કા માટે 20 મે , છઠ્ઠા તબક્કા માટે 25 મે અને 7મા તબક્કા માટે 1 જૂનના રોજ મતદાન થશે. ચૂંટણી પરિણામો 4 જૂનના રોજ આવશે.