ઉનાના પીલુડી વનમાં રચાયો પ્રકૃતિનો અલૌકિક ‘નાગ-પ્રણય’ ઉત્સવ
બાબુભાઈની વાડીના ઢોરવાડામાં સર્જાયો દુર્લભ નજારો
નાગ-નાગણીના મિલનનું દિવ્ય દૃશ્ય મોબાઇલમાં કેદ, ‘ખલેલ ન પહોંચાડવી’ એ જ પ્રકૃતિધર્મ
અગ્ર ગુજરાત, ઊના
સૂર્ય નભમાં તપી રહ્યો હતો.એ વખતે ઉના તાલુકાના ખાપટ ગામના પીલુડી વિસ્તારમાં બાબુભાઈ ભીખા ભાઈ બારૈયાની વાડીનું ઢોરવાડિયું બપોરની નીરવતામાં ડૂબેલું હતું. માલઢોરની હાજરીમાં, પ્રકૃતિના ખોળે, એક અલૌકિક લીલા રચાઈ રહી હતી. કાળોતરા નાગદેવ અને નાગણદેવી પ્રણયના આદિમ નૃત્યમાં લીન હતા. ફેણ માંડી, દેહને વીંટળાવી, સૃષ્ટિના સર્જનનો અદ્ભુત ઉત્સવ ઉજવી રહ્યા હતા. વાડીમાં રોજિંદા કાર્યમાં વ્યસ્ત બાબુભાઈના પરિવારજનોની નજર અચાનક આ દિવ્ય યુગલ પર પડી. પળભર માટે સૌ સ્તબ્ધ થઈ ગયા. શ્વાસ થંભાવી દે તેવું એ દૃશ્ય હતું. પ્રકૃતિના ગુપ્ત રહસ્યનો પડદો જાણે આંગણામાં જ ઊઘડી ગયો. પ્રણયની પરાકાષ્ઠાએ પહોંચેલા નાગ-નાગણીને જોઈ સૌ રોમાંચિત થઈ ઊઠ્યા.
આ દુર્લભ, અવર્ણનીય ક્ષણોને કાયમ માટે સચવાઈ રાખવા પરિવારજનોએ અત્યંત સતર્કતા અને સંયમથી પોતાના મોબાઇલ કેમેરા બહાર કાઢ્યા. દૂરથી, કોઈપણ પ્રકારની ખલેલ પહોંચાડ્યા વિના, એ દિવ્ય પ્રણયક્રીડા ને કેમેરામાં કંડારી લીધી. ફેણની ફૂંફાડ, દેહની લચકતી લહેર અને બે જીવનું એકરૂપ થવું: પ્રકૃતિનું કેટલું અદ્ભુત કાવ્ય!
જાણકારો કહે છે કે નાગ-નાગણીના પ્રણયના દૃશ્યો સહેલાઈથી નજરે ચઢતા નથી. આ સૃષ્ટિની સૌથી ગુહ્ય અને પવિત્ર ક્રિયાઓમાંની એક છે. આવા સમયે તેમને જરા પણ ખલેલ પહોંચાડવી એ મહાપ ગણાય છે. તેમની એકાંત લીલામાં વિક્ષેપ પાડવો નહીં, એ જ પ્રકૃતિનો મૌન આદેશ છે. બાબુભાઈના પરિવારે આદેશ નું પાલન કરીને સાચા પ્રકૃતિપ્રેમીનું ઉદાહરણ પૂરુંપાડ્યું
શ્રદ્ધા અને સાવચેતી
ખાપટના આ પ્રસંગે આપણને શીખવ્યું કે પ્રકૃતિના દરેક સર્જનને માન આપવું જોઈએ. નાગને આપણે ત્યાં દેવ તરીકે પૂજવામાં આવે છે. તેમની પ્રણયવેળાએ દર્શન થવા એ સૌભાગ્યની નિશાની મનાય છે. પરંતુ સાથે જ એ પણ યાદ રાખવું જરૂરી છે કે સર્પઅત્યંતસંવેદનશીલ અને સ્વરક્ષણ માટે આક્રમક બની શકે છે. જો આપને પણ ક્યાંક આવા દૃશ્યો જોવા મળે તો દૂરથી જ દર્શન કરો. ફોટોગ્રાફી કરવી હોય તો ઝૂમનો ઉપયોગ કરો. નજીક જવાનો, અવાજ કરવાનો કે ખલેલ પહોંચાડવા નો પ્રયાસ કદાપિ ન કરવો. પ્રકૃતિની આ અલૌકિક લીલાને માણીએ, પણ તેની મર્યાદાનું સન્માન કરીને.
