અંબાજી મંદિરમાં દાનની ચોરી? CCTV વાયરલ

અયોધ્યા બાદ ગુજરાતના મંદિરમાં શંકાસ્પદ ઘટના

અંબાજી મંદિરમાં દાનની ચોરી? CCTV વાયરલ

ભેંડારા કક્ષામાં દાનની ચોક્કસ રકમની થપ્પી કર્મચારી પગ નીચે સંતાડતો હોવાના શંકાસ્પદ સીસીટીવી સોશ્યલ મીડિયામાં વાયરલ : દાનના નાણાની સુરક્ષા અને વ્યવસ્થાને લઇ ભારે ચર્ચા

અગ્ર ગુજરાત, અંબાજી

અયોધ્યામાં રામમંદિર દાન ચોરીનો મુદ્દો જ્યારે સમગ્ર દેશભરમાં ભારે ચર્ચાના સ્થાને છે, તેવા સમયે જ બનાસકાંઠા જિલ્લાના સુપ્રસિદ્ધ યાત્રાધામ અંબાજી મંદિરના ભંડાર કક્ષમાં બનેલી ચોરીની એક ઘટનાના જૂના સીસીટીવી (CCTV) ફૂટેજ હાલમાં સોશિયલ મીડિયા પ્લેટફોર્મ પર જોરદાર વાઈરલ થઈ રહ્યા છે. આ સનસનાટીભર્યા વિડીયો સામે આવ્યા બાદ અંબાજી મંદિરમાં દાનના નાણાંની સુરક્ષા અને વ્યવસ્થાને લઈને સોશિયલ મીડિયા પર ફરી એકવાર વિવાદ અને ભારે ચર્ચા જાગી છે.

સોશિયલ મીડિયા પર વાઈરલ થઈ રહેલા આ સીસીટીવી વીડિયોમાં સ્પષ્ટપણે જોઈ શકાય છે કે, મંદિરનો આઉટસોર્સિંગ (હંગામી) કર્મચારી અન્ય સહ-કર્મચારીઓ સાથે બેસીને ભંડાર કક્ષમાં નોટોની ગણતરી કરી રહ્યો છે. આ ગણતરી દરમિયાન અત્યંત ચતુરાઈપૂર્વક તે નોટોનું એક આખું બંડલ સરકાવીને પોતાના પગ નીચે સંતાડતો નજરે પડે છે. ઉલ્લેખનીય છે કે, ગત ૫ મેના રોજ આ જ કર્મચારી દાનની નોટોનું બંડલ ચોરી કરતા રંગેહાથ ઝડપાઈ ગયો હતો. આ ગુનામાં ઊંડાણપૂર્વકની તપાસ દરમિયાન સાથે તેના અન્ય બે સાથીદારોની પણ સીધી સંડોવણી ખુલી હતી, જેને પગલે પોલીસે ત્રણેયની ધરપકડ કરી હતી.

આ ચોરીની ઘટના તે સમયે બની હતી જ્યારે અંબાજી મંદિરના ભંડાર કક્ષમાં ભક્તો દ્વારા ચડાવાયેલા દાનના રોકડા રૂપિયાની નિયમિત ગણતરી ચાલી રહી હતી. મુખ્ય આરોપી અન્ય કર્મચારીઓની નજર ચૂકવીને રૂપિયાનું બંડલ પોતાના પગ નીચે છુપાવી દીધું હતું. ત્યારબાદ બહુ જ ચાલાકીથી તે આ નાણાં પોતાની સાથે બહાર લઈ જવા માટે બાથરૂમ જવાના બહાને રૂમમાંથી ઊભો થઈને બહાર નીકળી રહ્યો હતો. જોકે, આ દરમિયાન અચાનક તેના ખિસ્સામાંથી ₹૧,૦૪,૦૦૦ (એક લાખ ચાર હજાર) ની રોકડ રકમનું આખું બંડલ સરકીને નીચે જમીન પર પડી ગયું હતું. ત્યાં હાજર અન્ય ચોકસાઈ રાખતા કર્મચારીઓની નજર આ પડી ગયેલા બંડલ પર પડતાં જ સચ્ચાઈ સામે આવી ગઈ હતી અને તેમણે તાત્કાલિક આ ગંભીર ગેરરીતિ અંગે મંદિરના ઉચ્ચ અધિકારીઓને વાકેફ કર્યા હતા.

આ સંવેદનશીલ ઘટના સામે આવ્યા બાદ મંદિર ટ્રસ્ટના ચેરમેન અને બનાસકાંઠા જિલ્લા કલેક્ટરે આ મામલાને અત્યંત ગંભીરતાથી લીધો હતો અને હંગામી કર્મચારી સામે કડક કાનૂની વલણ અપનાવી તુરંત પોલીસ ફરિયાદ નોંધાવવા આદેશ કર્યો હતો. જિલ્લા કલેક્ટરની સૂચનાથી મંદિરના અધિક કલેક્ટર દ્વારા સ્થાનિક પોલીસ મથકમાં સત્તાવાર ફરિયાદ નોંધાવવામાં આવી હતી. આ ફરિયાદના આધારે પોલીસે મુખ્ય સુત્રધાર ઉપરાંત તેના સહ-આરોપીઓની કાયદેસરની ધરપકડ કરી લોકઅપ ભેગા કર્યા હતા. ત્યાર બાદ કોર્ટે આ સહ-આરોપીઓના ૫ દિવસના રિમાન્ડ પણ મંજૂર કર્યા હતા. પોલીસે સઘન તપાસ કરીને ચોરાયેલા બંડલમાંથી ₹૫૦૦ ના દરની ૨૦૮ નંગ નોટો (કુલ ₹૧,૦૪,૦૦૦) સફળતાપૂર્વક રિકવર કરી લીધી હતી.

CCTV જૂના, નવી ઘટના નથી : વહિવટદાર

હાલમાં આ સીસીટીવી ફૂટેજ વાઈરલ થતાં અંબાજી મંદિરના વહીવટદાર કૌશિક મોદીએ સત્તાવાર સ્પષ્ટતા આપતા જણાવ્યું હતું કે, સોશિયલ મીડિયા પર અત્યારે જે સીસીટીવી ફૂટેજ ફરી રહ્યા છે તે જૂના છે અને આ નવી ઘટના નથી. આ ચોરીની ઘટના જ્યારે પ્રકાશમાં આવી હતી, તે જ સમયે ત્વરિત પગલાં ભરીને ત્રણેય આઉટસોર્સિંગ કર્મચારીઓ વિરુદ્ધ એફઆઈઆર (FIR) નોંધી દેવામાં આવી હતી અને તેમને તાત્કાલિક અસરથી નોકરીમાંથી બરતરફ એટલે કે હાંકી કાઢવામાં આવ્યા હતા. વહીવટદારે વધુમાં ઉમેર્યું હતું કે, કાયદાકીય પ્રક્રિયાના ભાગરૂપે હાલમાં આ તમામ આરોપીઓ કોર્ટમાંથી જામીન પર મુક્ત થયેલા છે અને મંદિર પ્રશાસન દ્વારા ભંડાર કક્ષની સુરક્ષા વ્યવસ્થા વધુ સુદ્રઢ કરવામાં આવી છે.